Local News

ကျောက်တော်မြို့မရဲစခန်းမှ ဒုတပ်ကြပ်တစ်ဦးသေနတ်ပစ်ခံရ

ရခိုင်ပြည်နယ်၊ ကျောက်တော်မြို့မရဲစခန်းမှ ဒုတပ်ကြပ်တစ်ဦး မိမိရွာသို့ ဆိုင်ကယ်ဖြင့် ပြန်စဉ် သေနတ်ပစ်ခံရ၍ ဒဏ်ရာရရှိသွားခဲ့ပြီး ကျောက်တော်ဆေးရုံသို့ အရေးပေါ်ပို့ဆောင်လိုက်ရကြောင်း သတင်း ရရှိသည်။

သေနတ်ကျည်ထိမှန်ခဲ့သူမှာ ကျောက်တော်၊ မြို့မရဲစန်း မှ ရဲဒုတပ်ကြပ် ဦးကျော်ထွန်းလှ (၄၅)နှစ်ဖြစ်သည်။

၎င်းသည် ယနေ့ မတ်လ ၂၆ရက် ညနေပိုင်းတွင် အရပ်ဝတ်ဖြင့်ကျောက်တော်မြို့မှ မိသားစုရှိရာ သရက်တပင်ရွာသို့ ဆိုင်ကယ်ဖြင့် သွားရောက်စဉ် ဂစ္ဆပနဒီ တံတား အလွန်တွင် သေနတ်ဖြင့် ပစ်ခတ်ခံခဲရခြင်းဖြစ်ကြောင်း မိသားစုဝင်များက ပြောသည်။

ဆေးရုံတွင် လူနာစောင့်ပေးနေသူ ကျောက်တော်မြို့မရဲစခန်းမှ ဒုတပ်ကြပ်တစ်ဦးလည်းဖြစ်၊ ဦးကျော်ထွန်းလှနှင့် မယားညီအစ်ကိုတော်စပ်သူလည်းဖြစ်သည့် ဦးကျော်သာထွန်းက ” သူ့ညာဖက်လက် လက်မောင်း အရိုးနှစ်ချောင်းကျိုးသွားပါတယ်။ ကျည်ဖောက်ထွက်သွားတာ။ မနက်ဖြန် စစ်တွေယူ သွားဖို့လိုအပ်ရင် ယူသွားရမယ်။ ဘယ်သူ ပစ်တာလဲဆိုတာ လူနာကိုမေးကြည့်ရမယ်။ သူပြောတာက ဂစ္ဆပနဒီ တံတားအလွန် လောက်မှာ ပစ်ခံရတယ်လို့ ပြောပါတယ်။ အဲဒီနားမှာ ၃၇၄၊ ၃၇၅၊ တပ်မလည်း ရှိပါတယ်။ အခုက သူက စကား မပြောနိုင်သေးဘူး။ ကျွန်တော်တို့လည်း အတိအကျ မသိဘူး။ မနက်ဖြန်လောက်မှ ဘယ်သူပစ်တယ်ဆိုတာ သူပြောပါလိမ့်မယ်”ဟုပြောသည်။

ရဲဒုတပ်ကြပ်ဖြစ်သူ ဦးကျော်ထွန်းလှမှာ သရက်တပင်မှနေပြီး ကျောက်တော်မြို့မရဲစခန်းတွင် တာဝန် ထမ်းဆောင်နေသည်မှာ တစ်နှစ်နီးပါးခန့် ရှိနေပြီး မိသားစုရှိရာသရက်တပင်ရွာသို့ ရံဖန် ရံခါ ပြန်ကြောင်း သိရသည်။ ယနေ့တွင် သမီးဖြစ်သူအား အောက်မေ့၍ သရက်တစ်ပင်ရွာသို့ အပြန်တွင် ယခုကဲ့သို့ သေနတ်ပစ်ခံရခြင်း ဖြစ်ကြောင်း သရက်တစ်ပင်ရွာတွင် နေထိုင်သည့် ဇနီးဖြစ်သူ မခိုင်ဆန်းက ပြောသည်။

“ကျွန်မအမျိုးသားဆိုင်ကယ်မှောက်တယ်လို့လည်းကြားတယ်။ သေနတ်ပစ်ခံရတယ်လို့လည်းကြားတယ်။ အတိကျမသိဘူး။ တပ်မမှာဖြစ်တာ။ တပ်မအနားက ၃၇၄ တပ်ရင်း ဂိတ်ရှေ့ နားမှာ ဖြစ်တယ်။ အခု ဆေးရုံမှာလို့ သိရတယ်။ ကျွန်မတို့က မိုးချုပ်နေပြီဆိုတော့ ဆေးရုံကို သွားကြည့်လို့ မရဘူး။ ကျွန်မ ယောက်ျားနဲ့အတူ ကျွန်မခဲအိုလည်းရှိနေပါတယ် ဆေးရုံမှာ။ လက်ကျိုးသွားတယ်လို့ ပြောတယ်။ သမီးလေးတွေ ငိုနေကြပြီ။ စိတ်ပူမိပါတယ်။အခုပြေးလိုက်သွားချင်ပါတယ်။ ကျောက်တော်ကို” ဟု သူမက ပြောသည်။

ကျောက်တော်မြို့မရဲစခန်းအား အသေးစိတ်သိရှိရန်ဆက်သွယ်သော်လည်း ဆက်သွယ်မှုမရရှိခဲ့ပါ။

ကျောက်တော်မြို့နယ် အုပ်ချုပ်ရေးမှူးအားဆက်သွယ်သော်လည်းဆက်သွယ်၍မရရှိခဲ့ပါ။

194 Shares

Comments are Closed

Powered by M.N.T

194 Shares
Tweet
Share194